شيماء سمير، بنت محجبة من فيصل، عندها 24 سنة، خريجة جامعة خاصة بكالوريوس هندسة قسم عمارة دفعة 2005، وبتشتغل فى محل أنتيكات فى المهندسين لأنها ما لقتش شغل تانى. من حوالي أكثر من سنة دخلت لعبة المدونات علشان تعبر عن نفسها من خلال موقع shaima2.net، وهى كمان واحدة من مجموعة البنات إلى أطلقوا حملة "كلنا ليلى" فى شهر سبتمبر اللى فات. وهو شعار جمع أكثر من 50 واحدة للدفاع عن حقوق الستات من خلال الإنترنت والمدونات.

- إيه حكاية "كلنا ليلى" ؟ إزاى ظهر وهل ح تستمر؟

كنا بنتكلم أنا وإيمان اللى اتعرفت عليها من خلال مدونتها "لست أدرى"، هى لسة بتدرس هندسة اتصالات وعندها قيود جامدة في البيت... لو تأخرت بعد تسعة يبقى فيه خناقات (أنا أحسن شوية مسموح لى لحد الساعة 12). قلنا طب ليه ما نتكلمش عن القيود اللى على البنات في الشغل،.. عن مشاكلنا كلنا. عرضنا الفكرة من خلال النت على مجموعة المدونات اللي كلهم تقريبا عندهم ما بين 18 و30 سنة، يعنى معظمهم فى العشرينات. وحددنا شهر 9 علشان قبل المدارس واتكلمنا كلنا في يوم واحد، 50 بنت وسيدة عن مواضيع تخص البنات.

أنا مثلا اتكلمت عن تجربتى فى قسم عمارة إللى مسميينه قسم البنات، وإزاى إنه فيه دكاتره بيساووا بين الولد والبنت في المواقع والتدريب .. إلخ وأساتذة لأ..

إحنا كنا خمسة ورا "كلنا ليلى"، إتقابلنا مرة ويمكن بعد كده كل كلامنا يبقى من خلال الإنترنت، حبينا نثير مواضيع كتير أول مرة لكن بعد كدة ح نختار قضية واحدة مثيرة للجدل نتكلم فيها يوم تسعة من كل شهر .. عن التحرش الجنسى مثلا.

أنا من شهور كنت أتكلمت عن التحرش فى shaima2.net عن حاجات بتحصل فى الحياة عموما .. إزاى ندافع عن نفسنا .. إزاى نضرب، مش عايزة أقولك كمية البهدلة والشتايم إللى وصلتنى من الولاد. قالوا لى إنت لازم بتلبسى كذا.. ما فيش بنت محترمة يحصل لها كده...

- أخترتم "ليلى" بطلة "الباب المفتوح" للطيفة الزيات كرمز ووضعتهم أفيش الفيلم اللي يحمل صورة فاتن حمامة وصالح سليم هل لأن ليلى تعتبر نموذج البنت المصرية ورمز لحركة تحرير المرأة بعد ثورة يوليو 1952؟

أنا ما بحبش الفيلم ده على فكرة، لإنه ليلى كانت مقهورة جدا بشكل غبى، يزعقلها علشان حطت روج فتمسحه.. مريم - واحدة منا - اقترحت ليلى، لأنها مصرية، وناس كثيرة وافقت فقلبت علشان إحنا ديمقراطيين.

- ممكن اعتباركم مدونات نسائية وللا نسوية؟

أنا مش مهتمة بالتصنيفات، أنا عن نفسى مش نسوية، لأن النسوية مرتبطة عندى بصورة كاريكاتورية متطرفة زيادة عن اللزوم، زى الأفلام اللي قدمت جمعيات المرأة تساوى الرجل وكانت مثار سخرية جامدة .. أنا دايما أقول الراجل راجل والست ست.

أغلب المدونات بيتكلموا عن مشاكل عادية، حاجات من أبسط حقوقهم، مثلا إزاى أمشى في الشارع من غير ما حد يتفرج علىَّ لمجرد إني بنت، معظمه حكى شخصي وساعات كتير فى صيغ أدبية. حكى شخصى ممكن يبقى فى موضوع سياسى زى ما زينب عملت أيام الانتخابات، حكت إلى حصل من منظور شخصى. ساعات فى ناس تكتب حاجات خارجة .. أقراها بس أبقى متضايقة

- لو وقعتي في الحب، هتحكى ده على مدونتك.

ممكن أثير الموضوع بس ما أقولش إنه أنا، ما دام لسة ما اتجوزناش. فى مناطق ما أحبش حد يتخطاها.

- ليه عملت مدونة خاصة بك؟ هل انتشار المدونات مرتبط بالوضع السياسي؟

المدونات وسيلة للتنفيس، صعب يبقى لها تأثير مباشر.. 2000 واحد ح يأثروا على 70 مليون إزاى؟ ولما اتقبض على بعضنا الناس خافت. فيه مواقع لها طابع سياسي أكثر زى "الوعي المصري" أو "التعذيب فى مصر”، ظهرت فى نفس الوقت مع حركة الرفض السياسي من الشباب. لكن أنا مدونتى شخصية. أنا تعبانه، عايزة أحس إنى حرة .. يبقى عندي مكاني الخاص..

الحجاب كان اختيارك زى ما اخترت أنه يكون عندك منطقة حرة للتعبير؟

90% من المدونات محجبات، إحنا مش بنغطى عقولنا. زينب بتاعة "بنت مصرية " ومريم بتاعة "Seeking Freedom" وإيمان "لست أدرى" محجبات.

(معظم الوقت هى تعرف أسامى المدونات الأولى فقط)

أنا اتحجبت من وأنا فى ابتدائي وكان إجبار.. أهلي أصروا إنى أتحجب.. ما كنتش فاهمة وفضلت فترة طويلة لحد ما اقتنعت. وأنا في ثانوي بقيت مقتنعة 100%. قعدت أقرأ في الدين.. كنت فى الأول أقول ح أشيله أول ما أتجوز، دلوقت لو اتجوزت وجوزي قاللى شيلى الحجاب ح أرفض.. ده أخد وقت.

فى حاجة فى حياتك اتغيرت بعد المدونات؟

علاقاتى زادت واتعرفت بناس ما كنتش أتخيل إنى أعرفهم، كثير من المدونيين عندهم انتماءات يسارية مثلاً. بقيت أتعامل مع الرأي الآخر بسعة صدر أكثر.. أتقبل مثلا لما يقولوا على أنه "ثقافتى منزلية" علشان محجبة وأناقش. كل يوم خميس نخرج مجموعة من المدونين ومستخدمى اللينوكس (برنامج سوفت وير بديل لميكروسوفت) نتقابل فى كافيه فى الزمالك. وسط البلد وقهواته إللى ممكن نستخدم فيها النت بقى مركز لنا.

لو أتجوزت ح استمر.. ليه لأ؟ أكيد مش ح أتجوز واحد عكس اتجاهاتي..